Commencement Address

 

Commencement Address

Macarthur II Elementary School

May 28, 2024

Ini nga adlaw, mahinungdanon nga iyo ginseselebrar an iyo kadaugan sin sulod sin sayo ka tuig sa mga recognized learners ngan sa iyo nga mga graduates, sulod sin unom ka bulan. Puno sin kalipayan ngan kakurihan, puno sin magkadurudilain nga panhitabo sa sulod san eskwelahan nga sa tagsa tagsa niyo nga pamilya. Pero sa kadurhuan, napamatud an niyo, nga bunga san paghigugma san iyo pamilya ngan paghigugma niyo sa pag-aram, natindog kamo niyan, nakaigbaw an ulo ngan nagdadako dako nga natugbos nga masugad kamo, kinaya namon yana ngan sigurado nga kakayanon namon an masunod nga mga pitad san amon pag-aradman. Sanglit, congratulations sa iyo nga mga honor learners ngan graduates san Macarthur II Elementary School. 

Pero maaram ba kamo nga diri la kamo an honors learners ngan graduates didi niyan, honor ngan graduates liwat an iyo mga kag-anak nga nag-ataman ngan nagtalinguha nga makaabot kamo sini nga okasyon.

An recognition ngan graduation, panahon ini san pagtatapos ngan pagtitikang. Pagtatapos san sayo o unom ka tuig nga pag-aram. Pagtitikang, tungod nga panahon liwat ini san pagpiktaw niyo sa bag-o nga talud san iyo pag-aradman. Sa mga graduate, yana an unahon niyo nga pitad pakadto sa Junior High School. Ngan kaangayan gud la ini niyo nga igselebrar. Saludo kami sa iyo.

Sayo nga pinakamaupay nga parte san pagiging bata o eskwela sa elementarya, lain san waray katapusan nga pag-uruyag, mao an mga oras nga kun diin kamo nga mga bata, nag-iinop o nagdudumdum san iyo kabubuwason, kun magiging nanu kamo pagdaragko niyo, magiging teacher ba, doctor, engineer, opisyal o empleyado san gobyerno, mag-aabroad ba kamo o didi la kam sa Pilipinas, magiging negosyante ba kamo o kun nanu pa man. Ngan para sa ako, an pag-inop o an pag-ambisyon mao an pinakamaupay nga buruhaton mientras bata pa kamo, tungod nga ini nga iyo inop o ambisyon, mao an magdadara sa iyo sa masuna nga kabubuwason. Kun nanu man an iyo ambisyon, hangkupi niyo ini, isipa niyo pirmi, ig-ampo niyo sa Makagarahum nga Ginoo, sigurado matutuman ini maski nanu pa man an umabot nga kakurihan. Kaparehas san iyo mga pamilya, ako, kaupod san iyo mga teacher, nag-agi kami tanan sin damu nga kakurihan, pero tungod san inspirasyon nga ginhahatag san amon mga inop sa kinabuhi, naabot namon kun nanu man nga propesyon may-ada kami niyan. Pero diri la masugad nga magparainop nala, upodan niyo sin duruto ngan pag-ampo. Ayaw pag-ilalaum sa swerte o kun magana kamo sa lotto. Aram niyo, an pinakamaswerte nga tawo, mao adto nga mga magduruto, labihan na an magduruto mag-aram ngan maduruto sa trabaho. Kamaduruto an kinahanglan san masarig nga kinabuhi. Ngan kun masarig an kada sayo sa aton, masarig liwat an mga pamilya ngan an bug-os nga nasud.

Nasugad an iyo tema, Kabataang Pilipino Para sa Matatag na Kinabukasan Para sa Bagong Pilipinas. Gintatagan bug-at sini nga tema nga kamo an kabataan, an sa unina magtitindog sin magsarig nga pamilya ngan masarig nga Pilipinas. Kamo an kabataan nga magtitimangno sa aton kapalibutan para ini magpadayon nga maghatag sin kinabuhi ngan pakabuhi sa yana ngan masunod nga henerasyon. Kamo an Kabataan nga magtitindog sin limpyado nga panggobyernuhan ngan nagtitimangno sa panginahanglan san iyo igkasitawo. Kamo an kabataan nga magseserbe nga modelo san maupay nga pamatasan sa iyo kasangkayan ug igkasi kabataan. Sa madali nga istorya, dako an paglaum sa iyo san aton Iroy nga Tuna nga kamo magdaragko nga may-ada paghigugma sa aton nasud, paghigugma sa aton kapalibutan ngan paghigugma sa Diyos. Sigurado ako nga kaya niyo ini tindugan tungod nga mao ini an sentro an iyo pag-aradman didi sa Macarthur II Elementary School. Kaya pasalamati niyo san iyo mga magduruto nga mga teacher.

Sa kadurhuan, hinigugma ko nga graduates, paningkamot kamo. An una nga magbubulig sa iyo waray iba kundi an iyo kalugaringon. Pag-ambisyon kamo lapus pa san naiimdan niyo nga kalubihan ngan kaumhan didi sa Sitio Malongbacong. Sayo la kamo ka beses magiging kabataan ngan estudyante ngan diri na naibabalik an panahon. Kada adlaw himua niyo an pinakamaupay niyo ngan waray kamo pagbabasulan. An klase san kinabuhi nga magkakamay-ada kamo pagdaragko niyo, nakadepende san iyo ginhihimo niyan nga estudyante pala kamo. Mga graduates san Macarthur II Elementary School, ipadayon niyo ini nga iyo maupay nga gintikangan, ngan maghihingaupay kamo yana ug sa masunod nga mga adlaw.

Congratulations! Maupay nga kulop sa iyo ngatanan.